"Nesta familia non hai segredos!", proclama ao inicio do libro Damián, o pai, un home de ideas e ideais fixos, obsesionado coa rectitude e a pedagoxía. Pero esa casa sen segredos está, en realidade, ateigada de fendas e a opresión que se respira entre as súas paredes terminará creando vías de escape, códigos clandestinos, ocultacións, finximentos e mentiras.
Formada por dúas nenas, dous nenos, unha nai e un pai, esta familia, aparentemente normal, de clase traballadora e chea de boas intencións é a protagonista dunha novela coral que abarca varios decenios e en cuxas historias latexa o desexo de liberdade e a crítica aos pilares tradicionalmente sostidos e que aínda sostén a institución familiar: autoritarismo e obediencia, vergonza e silencio.